Greinar

Leikskólar Hafnarfjarðar opnir allt sumarið

Fræðsluráð Hafnarfjarðar samþykkti á fundi sínum  í dag, 12. febrúar  að afnema sumarlokanir í leikskólum Hafnarfjarðar.  Frá og með sumrinu 2021 verða  leikskólar Hafnarfjarðar starfræktir allt sumarið. Í könnun sem gerð var meðal foreldra leikskólabarna var spurt út í núverandi fyrirkomulag og hvort vilji væri fyrir því að hafa val  um aðra mánuði en júlí mánuð.  Niðurstaðan var afgerandi, 79% foreldra vildu velja  í  hvaða mánuði barnið þeirra tæki  sumarfrí  og auka þannig möguleika sína á því að vera í fríi á sama tíma og barnið.  Foreldrar munu geta valið um frí í júní, júlí eða ágúst, allt eftir þörfum hvers og eins.  Taka þarf frí samfleytt í 4 vikur í senn eins og verið hefur.  Unnið verður að þessum breytingum í góðu samstarfi og samtali við stjórnendur og starfsfólk leikskólanna og  foreldrum leikskólabarna.  

Börnin í fyrsta sæti

Hafnarfjörður er barnvænt samfélag sem setur  hag barna í fyrsta sæti og hefur unnið markvisst að því að bæta þjónustu við börn og  fjölskyldur. Frelsi foreldra til að taka frí fyrir börn  sín í öðrum mánuðum  tryggir enn frekar góða  þjónustu við barnafjölskyldur og þar með frekari  möguleika foreldra til að taka frí á sama tíma og auka þannig samverustundir þeirra með börnum sínum.  Fyrra  fyrirkomulag hefur sett foreldra og börn í ákveðin vanda yfir sumartímann og foreldrar þurft að leita annara leiða til að tryggja vistun fyrir börn sín þegar leikskólinn lokar og foreldrar ekki í sumarfríi á sama tíma. Ákvörðunin er ekki einungis tekin út frá  niðurstöðu könnunarinnar heldur hafa rannsóknir bent  til þess að  tengslamyndun barna við foreldra sína á fyrstu æviárum þeirra  skiptir miklu máli í uppvexti þeirra og þroska og teljum við því að með þessari ákvörðun séum við að taka stórt skref í barnvænu samfélagi sem við búum við hér  í Hafnarfirði.

Kristín Thoroddsen, formaður fræðsluráðs.
Margrét Vala Marteinsdóttir, varaformaður fræðsluráðs.

Greinin birtist fyrst í Hafnfirðingi 12. febrúar 2020