Guðbjörg Oddný Jónasdóttir

Ég heiti Guðbjörg Oddný Jónasdóttir og er bæði varabæjarfulltrúi og varaþingmaður ásamt því að starfa sem samskiptastjóri og aðstoðarmaður framkvæmdastjóra hjá Benchmark Genetics. Ég sækist eftir 3. sæti á lista Sjálfstæðisflokksins í Hafnarfirði fyrir kosningarnar í maí.

Ég vil hafa fast sæti í bæjarstjórn okkar Hafnfirðinga þar sem ég get haft áhrif og mótað framtíð bæjarins með mínum hugsjónum og áherslum.

Ég er uppalin í Hafnarfirði, fædd 5. febrúar 1985 og bý ásamt eiginmanni mínum Gísla Má Gíslasyni, hagfræðingi og börnunum okkar þrem, Gabríelu (7 ára), Gísla (4 ára) og Garpi (2 ára) í vesturbæ Hafnarfjarðar.

Ég lauk MA gráðu í alþjóðasamskiptum frá Háskóla Íslands 2011 og BA gráðu í heimspeki, hagfræði og stjórnmálafræði frá Háskólanum á Bifröst árið 2008. Ég lauk stúdentsprófi frá Menntaskólanum í Reykjavík.

Ég skipaði 6. sæti á lista flokksins í kosningunum árið 2018 . Ég hef starfað sem formaður menningar- og ferðamálanefndar ásamt því að vera aðalfulltrúi bæði í fjölskylduráði og fræðsluráði. Ég hef einnig starfað í hinum ýmsu starfshópum og er fulltrúi bæjarins í stjórn Markaðsstofu Hafnarfjarðar.

Ég hef sinnt margvíslegum trúnaðarstörfum fyrir Sjálfstæðisflokkinn síðustu 12 ár og hef setið í stjórn Stefnis, félags ungra Sjálfstæðismanna í Hafnarfirði og stjórn Fram, Sjálfstæðisfélags Hafnarfjarðar, sem varaformaður. Ég sit núna í stjórn fulltrúaráðsins í Hafnarfirði og í framkvæmdastjórn Landssambands Sjálfstæðiskvenna.